ALDAW TI PANNAKA-ISALAKAN

Mateo 28:19-20

Maysa kadagiti kapatgan nga sursuro ti Iglesia Luerano ket dagiti sakramento; mamati tayo nga nga dua laeng ti rumbeng nga agbalin nga sakramento.. Buniag ken Kumulgar gapu ta maiwaras ti gracia ken pamakawan nga inaramin ni Apo Jesus. Ngarud kakabsat ko ken Kristo ti pangangiwaragawag ti SAO ti Dios ket bunga ti pannaka-isalakan tapno dagiti saan pay makaammo ti pudno nga dalan ket malawagan ti nasipnget nga dalan da. 

Ti biag ti maysa nga pasurot ni Jesus ket panangipasa iti pannaka-isalakan nga insurro na mismo. Isuna nga nagragsak ti entero nga angeles sadi langit no adda maysa nga tao nga agbalin nga anak manen ti Dios.

Ita nga aldaw dagiti angeles sadi langit  adda manen rag-o nga marikna da gapu ta tallo nga parsua ti mang-awat manen ken Apo Jesus. Nalukatan manen ti gracia idiay langit ket adda manen wagas tapno dagiti bendisyun nga inkari ni Apo Jesus ket maawat dagiti umay nga siraragsak iti Sakramento ti Bunyag.

Kadagiti mabunyagan kayat mi nga iebkas ti nabara nga kablaaw gapu ta daytoy maaramid kadakayo ita ket ti kabanuran nga pasamak ti biag ti maysa nga Kristiano.

Dagiti ited ti buniag

1)      Nalawaganen ti biag gapu ta inmayen ti silaw iti biag, ni Apo Jesus. Isunga dagiti mabunyagan magna kayo koma ditoy a biag a napno iti lawag tapno makita dagiti tattao nga adda kadakayun iti lawag.

2)      Naikawisen ni Kristo kadakayo—dagiti kinarugit nga inpatawid ti basol da Adan ken Eba ken nilinisan ni Jesus. Amin nga tao ket narugit gapu iti basol ngem gapu iti bunyag nga inkari ni Jesus; Dagiti Saona ken agtrabaho ket isu ti manglinis ti kinarugit tayo. Ni Jesus naikawisen kadagitoy mabunyagan ita nga aldaw ket ti kinalinteg nga biag ni Jesus ket maaddan kadakayo.

3)      Ti Basol ket mapakawan: addo dagiti saan nga mamati nga ti Sao ti Dios ket awan panakabalinna. Isu nga ti panagkitada iti buniag ket awan kano koneksyon na iti pannaka-isalakan. Daytoy ket saan nga pudno gapu ta ti Dios ti nagapuan amin nga bannag—idi naparsua ti lubong ket gapu iti Sao iti Dios; idi adda ni Apo Jesus ditoy daga ket dagiti SASAO NA ti nangted biag, pannaka-isalakan ken nagaramid iti addo nga nakaskasdaaw iti imatang dagiti addo nga tattao. Idi biniag ni Apo Jesus ni Lazarus ket gapu iti SAO na mismo isunga apay nga mapan tayo pagduaduaan ti SAO ti Dios. Ti bunyag ket SAO mismo ti Dios nga kinumpet iti elemento (danum). Ti pannaka-isalakan ket aramid amin ni Jesus ket maysa nga wagas tapno maited daytoy napateg nga bendisyun ket babaen iti bunyag.  Isunga kas kuna mi itay kablaawan mi dakayo gapu ta ti biag yo itan ket addan iti ima ti Dios.

PANANGITULOY NGA AGBIAG ITI LAWAG

Kalpasan dagitoy nga seremonya; ragsak ken mangan tayo kas simbolo iti panagrambak  tayo para kadagitoy nga annak tayo. Inton bigat mairugin ti baro nga biag nga naited kadakayo ngarud rumbeng nga takderan dagiti pinati ken inawat. Ti panagbiag kas maysa nga pasurot ni Jesus ket saan nga nalaka gapu ta kabusor mon ti lubong ken dagiti kayat ti pisikal nga bagi idi ket rumbeng nga mapukaw. Dakayun nga tallo ti agbalin nga silaw iti lugaryo ken ni Apo Jesus makipagnaed kadakayun idiay balay nga ayan yo. Ituloy yo  nga agbiag nga adda buteng na iti Dios ken naragsak met nga mangipadamag nga ni Jesus ket sinubbot dakayun iti basol.

Ni Jesus ay-ayaten na datayo amin; saan na kitkitaen dagiti napalabas nga inaramid tayo. Idi inted tayun ti biag tayo iti ima na nalipatannan dagiti kinakapuy tayo ket adda isunan nga makilanglangen kadatayo iti inaldaw. Pagbiit lang ti kaadda tayo ditoy daga; saan nga mapo-utan ti panawen gapu ta napartak nga aglabas. Ni Jesus laeng ti ayan ti permanente ragsak ken pigsa- iti panagbiag tayo ado ti rigat ket sakit ti nakem ti intay amin napadasan ngem ni Jesus latta ti kompetan ta Kenkuana saan na datayo nga ib-ibatan gapu ta naragsak latta isuna no agtalek tayo Kenkuana.

Naragsak nga panagbuniag ken ti Dios ti maadda kadatayo amin.

Amen