MATEO 6:25-33

PAMMATI TI MANGTED TI KASAPULAN

Gracia, asi ken talna ti maadda kadatayo amin iti nagan ni Apo Jesus. Amen

I.

Idi pinarsua ti Dios ti lubong ket napintas amin gapu ta saan pay nga natinnag ti tao iti basol. No basaen tayo ti Genesis inbaga mismo ti Dios nga nasayaat amin nga pinarsua na. Ngarud da Adam ken Eba ket saan da kasapulan nga agbannog tapno mangan da. Amin ket addan  iti sango ket mapan da laeng purusen amin nga taraon nga makita da.

Ngem nagballiw amin idi natnag dagiti umuna nga pinarsua ti Dios- kasapulanen nga agling-et santo mangan dagiti tao. Isu nga amin nga pigsa ken panawen tayo tatta ket nakaturong no kasano ti ikasta nga agbiag. Saan nga dakes ti nagaget ken panunuten ti masakbayan ti pamilya ngem rumbeng latta koma nga iti Dios iti ipangpangruna.

Idi sinolisug ti Diablo ni Jesus ti umuna nga inusar na ket diyay tinapay wenno dagiti kasapulan ti bagi. Ngem ni Apo Jesus pinaneknekanna nga saan laeng nga tinapay ti kasapulan ti bagi no di ket dagiti SASAO ti Dios. Dagiti Sao ti Dios ti ayan ti pudno nga kasapulan.

No kitaen tayo iti aglawlaw kakabsat kaadwan kadagiti kakabsat tayo ket dagiti material nga kasapulan ti papanan amin nga pigsa ken oras da. Ni Apo Dios ket bassit nga banag laeng ti panangkitada; isu nga bassit met ti oras iti maited KENYANA. Kastoy ti mapaspasamak kadagitoy nga panawen- TI DIOS KET BASSIT LANG NGA BANAG ITI BIAG TAYO. Kabaelan tayo nga agbuya ti pelikula, makichat ken agdengngeg iti musika nga mabayag ngem saan tayo maanusan nga agbasa ken agdengngeg ti SAO ti Dios uray maysa laeng nga oras. Ket kasano nga ited ti Dios dagiti kasapulan tayo, lagipen tayo nga amin ket nagapo Kenyana.

Ado iti napaay nga alaen dagiti arapaap da; ado ti nagsagaba ken nadadael pay dagiti pamilya ti kaadwan gapu ta amin nga pigsa ken oras da ket awan nagturongan na. Ti bukod nga pigsa ken sireb ti tao ket saan nga umanay tapno maala dagiti arapaap  ditoy nga biag.

Kasapulan nga ited umuna ti amin-amin tayo iti Dios ket isu ti manglukat ti puso ken panunut tayo tapno makita tayo ti pudno nga ayan ti ragsak. No adda ti Dios iti puso masabalyan dagiti kasapulan nga ammo tayo ket maamiris tayo nga  dagiti kasapulan ket inteden iti Dios. Ammo tayun nga agyaman  kadagiti bendisyun nga saan tayo ik- ikkan ti importansya idi saan tayo pay laeng nga mamati.

No idi ket kayat tayo iti dakkel nga balay tatta nga namati tayun saan nga kindakkel ti balay ti napateg no di ket ti urnos ken ayat nga adda iti uneg ti pagtaengan. Kayat ti Dios nga makita tayo ti ayat na isunga dagiti SAO na umuna ti intay tarigagayan.

II.

Dagiti tumatayab ket saan da madanagan wenno agtarigagay ti dakkel nga pagtaengan. Saan da madanagan no anya mapasamak no adda bagyo wenno kalamidad gapu ta ay-aywanan ti Dios isuda. No adda bagyo, mayat pay laeng ti sagawisiw da gapu ta awan danag nga marikna da. Dagitoy ti kayat ni APO Jesu nga kitaen ken pagadalan tayo; no adda pammati adda met panagtalek iti Dios kas inpakita ti Dios kadatayo babaen kadagiti billit. No dagiti animal ket mabbiag ken mangan da; datayo pay ngata nga anak iti Dios?

 Kakabsat ko ken Jesus ti panagtalek ti mangipakita no kasano ti kina-uneg ti pammati nga inted ti Dios kadatayo. Isunga kayat ti Dios nga agramut ken timmangkenen ti pammati sakbay nga maited dagiti tarigagay nga kayat tayo nga maala.

Kayat ti Dios nga adda tayo kadagiti imana sananto ited dagiti parabur nga maaramat tapno agbiag tayo nga naragsak ditoy daga. Apay? Gapu ta dagiti parabur nga ited ti Dios ket mausar tapno maidayaw ti Dios ken matulongan dagiti kakabsat nga mangammo Kenyana.

Ti Dios saan nga mangted iti  bannag tapno madadael ti panagdayaw tayo Kenyana.

III.

Ni Apo Jesus ti kanayun nga modelo tayo nga pasurot na. Amin ket adda Kenyana ngem immay latta ditoy daga nga ayan tayo gapu ti ayat na nga alaen amin nga nagtalek iti SAO na idiay pagarian ni Ama na. Adda latta pannakabalin ni Apo Jesus idi adda isuna ditoy daga ngem pulos nga saan na inusar tapno idayaw na ti bagi na. Inusar ti panakabalin nga adda Kenyana tapno: 1) MAIDAYAW TI DIOS. 2) AGSERBE KADAGITI MARIGRIGATAN KEN MADAGDAGSINAN.  Dagitoy inpakita ni Jesus ti intayo pagtuladan—ti pammadayaw ti lubong ket awan serbe na iti imatang ti Dios. Dagiti parabur nga maaw-awat tayo iti inaldaw ket para laeng iti Dios ken tumulong iti pada tayo nga tao TAPNO maam-ammo da iti Dios. Dagitoy dua nga nadakamat ket kanayun tayo koma nga lagipen gapu ta daytoy ti misyun tayo ditoy daga. Ni Jesus immay ditoy daga tapno agserbe ket dayta koma ti intayo tuladen.

Ti matay ken maiyaw-awan ket nakabutbuteng isunga ar-aramiden amin ti Dios ti wagas tapno ti BIAG ken DARA nga inted na ket saan nga masayang. Dios ti natay tapno saan tayun koma nga matay; ti pannaka-isalakan ket nalpas nga naaramid iti nagungar ni Apo Jesus iti patay, pammaneknek nga amin nga nagtalek iti SAO na ket nagungar met ken naaddaan ti baro nga biag. Ti Pagarian ti Dios ket nakasaganan kadatayo nga mamati ngarud AWAN TI PAGDANAGAN. Dagiti tumatayab ket awan kararwada ngem inaywanan latta ti Dios datayo pay ngata nga mismo nga darana ket intedna tapno agbiag ken makapan tayo idiay ayan ti balay ti Dios Ama?

Kakabsat ko ken Jesus amin nga pinarsua ti Dios ket para iti tao. Isunga saan tayo sayangen ti biag nga inted na. Idayaw tayo ti Dios ken agserbe tayo iti pada tayo nga tao; babaen kadatayo makita koma ti lubong ti ayat ni Apo Jesus.

Amen