EFESO 5: 21-25

TI PANAGMAYMAYSA ITI MAMATI

I.

Ti panagasawa ket estado nga inbilin ti Dios idi saan pay lang natnag ti tao iti basol; idi nalpas nga inted amin ti Dios ti kasapulan ti tao inbagana kada Adam ken Eba nga punwen da ti lubong gapu ta kayat ti Dios nga makita ti tao ti kinamanagayat ken kinalaeng ti Dios nga intayo daydayawen. Isu nga idi pinarsua ti Dios ti lubong kayat nan nga umado koma ti tao tapno maimatangan da ti kinasiasino ti Dios ket mapasamak lang daytoy no agtipon ti lalaki ken babae.

Addo ti panawen nga naglabas ket ita  adda tayun iti moderno nga kasasaad ngem kasapulan latta ti pammalubos ti Dios sakbay nga agtipon ti dua nga bagi ket agbalin nga maymaysa.  Itta nga aldaw kakabsat naawis tayo amin nga mangsaksi iti pammalubos iti Dios tapno da MYLA KEN BENJIE ket sumrek da iti estado ti panagasawa. Naragsak daytoy nga okasyun gapu da dua nga ganganaet ket nagtipon ket agbalinda nga maysa nga pamilya.

Iti texto nga naibasa inpakita mismo ni Apo Jesus ti responsilidad ken akem nga rumbeng nga aramiden ti dua nga nagtipon. Ti panagasawa ket panagbakkat iti responsibilidad gapu ta tunggal tugot nga dalyasaten ket dua kayun kanayun nga agdesisyun. Saanen nga mabalin nga gapatpatnag nga agpaysar ni BENJIE nga saan nga ammo ni MYLA kasapulan latta ti panagdanggay da kas agasawa iti amin nga banag nga aramidenda.

Iti umuna nga passet ti SAO ti DIOS ket ti panagraem ti agasawa ken Kristo; Dayta iti kangrunaan ti panagbaligi ti agasawa. No raemen ti tunggal partido ni Apo Jesus, awan ti parikut nga rumwar. Ammo ti tunggal maysa ti akem nga rumbeng na nga aramiden ket ti panagdinnanggay ket rumwar lattan gapu ta ti Dios ti agtrabtrabaho. Awan ti balligi ti panagkadwa no saan tayo ammo nga raemen ni Jesus.

·      Kayat ko lang iyunay-unay nga ti raemen tayo amin—ket ni JESUS saan nga diyay relihiyon nga ayan tayo. Sunga daytoy met ti solusyun tapno adda met panagkaykasya iti amin ang pasamak ken sitwasyun nga ayan tayo. NO raemen tayo ni Jesus adda panagdanggay nga Na Diosan ket dayta ti kanayun nga mangisiglot kadatayo tapno awan ti apa ken riribuk.

Ti lalaki rumbeng nga ibilang na ti asawana kas parti iti biag na; amin nga ragsak ken balligina ket adda kanayun ni asawana. Ti arapaap ken plano tapno rumang-ay ti pamilya; tapno masurwan nga nalaeng dagiti agbalin nga annak yo nga ited ti Dios ket kasapulan nga adda latta ti asawa nga mangmangted inspirasyun. Ti lalaki (Benjie) ti kangrunaan nga agplano ket ni Myla met ti mangted inspirasyun. Kasta ti panagdanggay nga ipakpakita ni Apo Jesus.

Saan nga rumbeng nga pisikal nga saktan ti asawa; daytoy met ti maipannakel ko nga ugali tayo ditoy Cordillera; nakababaen ti mangdangran iti babae dayta ket maysa nga kita ti kinatakrut ken kinakapsot. Ti normal nga tao ket saan na nga saktan ti bukod nga bagi rumbeng nga aywanan na gapu tano adda masapamak nga dakes iti salun-at tayo dagiti kameng ti pamilya tayo ti agsagaba. MYLA ken BENJIE no addan dagiti ubbing iti pagtaengan yo ti oras ken pigsa yun ken agpaay kadakwada.

Ni MYLA sika kanayun ti mangted pigsa ken lakay mo tapno kanayun nga agpursige nga mangaramid iti plano na tapno naimbag ti pagturongan ti pamilya nga bangonen yo. Suportaram kanayun dagiti plano na tapno mayat ti timpuyog yo nga agdalyasat iti dayoty nga lubong. Saan koma  nga sika ti siit nga mangted sakit ken lakay mo tapno marigatan isuna nga mangragpat kadagiti arapaap na para iti pamilya.  Dakkel iti akem mo tapno agbaligi ti taray ti pagtaengan nga bangonen yo.

Kayat ko manen nga ipalagip diyay istoryak tattay; TI KRUS ti rumbeng nga sentro ti pamilya. Saan lang nga ti lalaki ti mangbaklay no di ket kasapulan nga agtinulong dagiti dua nga masiknan tapno dagiti pagnaan ket masilawan tapno saan nga maiyaw-awan ti dalan nga inyunto sursuroten.  Ni Jesus ti silaw ti lubong; ni Jesus ti silaw ti pamilya amin nga banag ket adda amin kinyana tapno rumang-ay ken naragsak ti mabangon nga pamilya.

II.

Kitaen tayo to inpakita ni Jesus para iti Iglesia; inted na amin nga adda Kenkuana tapno maipasdek ket adda kadtayon ti pannaka-isalakan. Pinanawan na tin nam-ay nga add idiay pagarian ti Dios tapno bumaba ditoy daga nagrigat gapu iti ayat na nga mabangon ti bagi ditoy lubong. NI Apo Jesus ti ayan amin nga kababaelan tapno rumang-ay ti maysa nga pamilya. Inpakita na no kasano ayaten dagiti kadwa tayo, inpakita na no kasano agtulnog dagiti babae tapno agtunos ti ikasta nga magna; inpakita na ti panagsakripsiyo tapno ti bagi ken ulo ken agtimpoyug nga agtrabaho ket ti Dios ti maidayaw.

Kakabsat ko ken Kristo; ti panagballigi ti panagasawa ket panangikasaba ken Jesus. Ti Dios ti maidayaw no adda urnos ken ragsak ti uneg ti maysa nga pamilya. Mangipaneknek nga raemen ti tunggal maysa ni Jesus. Ti pangrugyan ti appa ken riribuk ket no ti maysa iti partido ti saan nga agraem ken Jesus. No raemen tayo ni Jesus tungapalen tayo dagiti bilin na nga siraragsak; Benjie- idaulom ti pamilyam. MYLA—sika ti mangted insparisyun ken lakay mo.